Muqdisho (so.diplomat.so) - Munaasada ka dhacday xarunta horumarinta haweenka SWDC ayay Hormuud Salaam Foundation ay lacago ku guddoonsiisay haweenka danta yar ee ku dhaqan magaalada muqdisho.
Guddoomiyaha xarunta Horumarinta Haweenka SWDC Sahra Mohamed Ahmed oo halkaasi ka hadashay ayaa Hormuud Salaam Foundation uga mahad celisay u gargaarida ay mar walba u taaganyihiin iyo caawinta haweenta danta yarta ee aan waxba haysan.
Raaxo Xusen Xirsi oo ah Ku xigeen Guddoonka Hormuud Salam Foundation ayaa ka hadashay munaasabada haweenkaasi lagu guddoonsiiyay deeqda lacagta iyo weliba timirta, waxayna sheegtay in deeqdan ay ugu talagaleen in haweenka danyarta ay kaalmo u noqoto inta lagu guda jiro bisha Ramadan.
Qaar kamid ah haweenka la siiyay kaalmada oo la hadlay warbaahinta oo u mahadceliyay Hormuud Salaam Foundation iyagoo ugu duceeyay in hantidooda Allah u barakeeyo.
Hormuud Salaam Foundation ayaa dardargelinaysa caawinta dadka danta yar iyo kuwa baahiyaha gaarka qaba, iyadoo hay’addu marka la gaaro bisha barakeysanee Ramadan, ay fuliso mashaariicda noocan oo kala ah, waana xilli ay hay’addu waddo barnaamijyo dadka masaakiinta ah lagu af-fursiiyo.
Faallo ka bixi